काठमाडौं- फिफा विश्वकप–२०२६ को समूह ‘एच’ अन्तर्गतको खेलमा उरुग्वे र साउदी अरबले १–१ गोलको बराबरी खेल्दै अंक बाँडेका छन् ।
अमेरिकाको फ्लोरिडास्थित मियामी स्टेडियममा मंगलबार बिहान सम्पन्न प्रतिस्पर्धात्मक खेलमा दुवै टोलीले स्पष्ट अंक जोड्ने अवसर गुमाएका हुन् ।
खेलको सुरुवाती आधा घण्टा दुवै टोलीले कडा प्रतिस्पर्धा गरे पनि पहिलो हाफको अन्त्यतिर साउदी अरबले अप्रत्याशित अग्रता लियो । खेलको ४१औं मिनेटमा साउदीका अब्दुल्लाह अलाम्रीले उत्कृष्ट गोल गर्दै टोलीलाई १–० को अग्रता दिलाएका थिए । पहिलो हाफमा साउदीले सोही अग्रतालाई कायम राख्यो ।
दोस्रो हाफमा उरुग्वेले खेलमा फर्कने रणनीतिसहित दबाब बढाएको थियो । बल पोजिसन (बल नियन्त्रण) मा पकड बनाएको उरुग्वेले साउदीको पोस्टमा लगातार आक्रमण बुन्यो ।
खेलभर उरुग्वेले ११ पटक ‘सर्ट अन टार्गेट’ प्रहार गरे पनि साउदीको बलियो रक्षापंक्तिका कारण गोल निकाल्न संघर्ष गर्नुपर्यो । साउदीले भने खेलभर मात्र ३ पटक त्यस्तो प्रहार गर्ने अवसर पाएको थियो ।
लगातारको प्रयासपछि खेलको ८०औं मिनेटमा उरुग्वेले खेललाई बराबरीमा ल्याउन सफल भयो । उरुग्वेका लागि म्याक्सी अराजोले गोल गर्दै टोलीको संकट टारेका थिए । अराजोको गोलपछि दुवै टोलीबाट थप गोल हुन सकेन र खेल १–१ को बराबरीमा टुङ्गियो ।
यो खेलको नतिजासँगै समूह ‘एच’ मा रहेका चारवटै टोलीले पहिलो खेलबाट समान १–१ अंक जोडेका छन् । यसअघि भएको सोही समूहको अर्को खेलमा स्पेन र केप भर्डेले पनि १–१ गोलकै बराबरी खेलेका थिए, जसका कारण अहिले यो समूहको समीकरण रोचक बनेको छ ।
विश्वकप अन्तर्गत मंगलबार नै भएका अन्य खेलहरूमा पनि बराबरीकै शृङ्खला देखिएको छ । आजै भएको पहिलो खेलमा बेल्जियम र इजिप्टले १–१ को बराबरी खेलेका थिए । त्यस्तै, आजको तेस्रो खेलमा समूहका अन्य दुई टोली इरान र न्यूजिल्यान्ड नेपाली समय अनुसार बिहान पौने ७ बजेबाट मैदानमा उत्रदैछन् ।
