पुगे सुर्खेतबाट हिल्सा पहिलो मोटरसाईकल
रेशमराज रोकाया
जेष्ठ, २३, २०८१
कर्णाली करिडोरको छारे सडक खण्ड नेपाली सेनाले ट्रयाक खुल्ला गरेपछि हुम्ला भ्रमणमा निस्कने आन्तरिक तथा बाह्य पर्यटक आउन थालेका छन् । सुर्खेत देखी हुम्ला जिल्लाको सदरमुकाम सिमकोट हुँदै चीन सिमामा रहेको हिल्सासम्म हाल सम्म कुनै पनि यात्रुले मोटरसाईकलको यात्रा तय नगरेको भएता पनि हाल दुई युवाले सफल यात्रा तय गरेका छन् ।
सुर्खेत देखी हुम्ला सम्मको दुरी ५ सय ४ किलोमिटरको यात्रा पहिलोपटक युवाद्धय सुर्जन रोकाया र शिवराम रोकायाले तय गरेको नेपाल प्रहरी हिल्सा स्रोतले जानकारी गरेको छ । पहिलोपटक यात्रामा कर्णाली प्रदेश ०२–००२प ५००० र ०२–००२प ५००१ को मोटरसाईकल मार्फत सवार यात्री रोकायाले बाटो कठिन भएको भएता पनि यात्रा सफल रुपमा तय गरेको जानकारी दिए । एक त कर्णालीको भुगोल नै कठिन भएको र सडक भरखर मात्र निर्माणाधिन रहेको भएको कारण यात्रा कठिन र साहशिक भएको मोटर साईकल यात्री सुर्जन रोकायाले बताउनु भयो ।
यात्रा कठिन भएको भएता पनि साहशिक यात्रा अनि सुन्दर प्रकृती नियाल्नको लागि यो मार्ग अति नै सुन्दर भएको अर्का यात्री शिवराम रोकायाले बताए । सुर्खेत हिल्सा सडकको च्याछहरा, दुल्ली कुना, बोक्चेगौंडा, हिलिङ्गको बाटो सहज बनाउन सकेको खण्डमा हुम्लाको यात्रा अति नै रोमाञ्चक हुने देखिएको छ । हाल यस सडक खण्डमा ४ पाङ्गग्रे सवारी साधन सहज रुपमा सञ्चालन भएको भएता पनि मोटरसाईकल यात्राको लागि अझै बाटोको अवस्था सुधार गर्नु पर्ने अवस्था रहेको छ । यात्रामा हुम्लाका वासिन्दाले दिने स्वागत सत्कार अनि यहाँको साँस्कृतिक महिमा, प्राकृतिक सौन्दर्यको अवलोकनले गर्दा पर्यटकलाई मन नै लोभ्याउने अवस्था रहेको छ । भविश्यमा नेपालको अन्य ठाउँ भन्दा यस ठाउँको बाटोको अवस्था सुधार गरेको खण्डमा हुम्लाको विभिन्न पर्यटकिय स्थलमा पर्यटकको भिँड लाग्ने सम्भावना रहेको छ ।
