काठेपुल बन्दा स्थानियको आर्थिक स्थितीमा सुधार
मंसिर २४
हुम्लाको उत्तरी चिन सिमामा रहेको गाउँपालिकाको लिमीको तिल गाउँका स्थानीयले बाह्र दिन लगाएर मोटर गुड्ने काठे पुल निर्माण सम्पन्न गरेका छन् । हिउँदमा हिउँ पर्ने र काम गर्न नपाइने निष्कर्ष निकाल्दै बिना सम्झौता सो कार्य गरेर पुुलमा गाडी गुडाउन समेत सफल भएका हुन् । उत्तरी लिमी गाउँमा मंसिर देखी हिमपात भएर बैशाख सम्म पुरै बाटो बन्द हुने गरेको छ ।
नाम्खा गाउँपालिका–६ को हिमालपारिको गाउँ लिमीको तिल बस्तीका स्थानीय लुण्डप तामाङले सम्झौता बिनै उधारोमा तिल गाउँ जोड्ने तिम्ज्यङु मोटरबाटोमा पर्ने लिमी कर्णालीमा काठेपुल निर्माण गर्न सफल भएको बताए । यसअघि नदीको छेउसम्म सडक निर्माण भएको थियो तर, पुल नबनेका कारण तिल गाउँ सडक निर्माण गरिए पनि सडक सञ्जालसँग जोडिन सकेको थिएन । पुल निर्माण पछि सदरमुकाम सिमकोट र चिन नाका खुले पछि सामान आयात निर्यातको लागि सहज हुने भएको छ । सामानको निकासी पैठारीले यहाँको वासिन्दाको आर्थिक स्थिती सुधार हुने र जनजीवनमा सुधार हुनेमा स्थानिय विश्वस्त रहेका छन् ।
बीस मिटर लम्बाई र पाँच मिटर चौढा काठेपुुल उधारोमा निर्माण गरेर तिल गाउँसम्म गाडी पुर् याउन स्थानीय सफल भएका हुन् । यसका लागि तिल गाउँका स्थानीयले सल्लीबाट काठ लगेर पुुल निर्माण गरेका हुन् । बजेट सुनिश्चित भएपछि उधारोमै भए पनि काम गर्ने आँट स्थानीयले गरेका हुन्। पुुलको योजना स्थानीय उपभोक्ता समूहबाट गरिएको हो । लिमीका वडाध्यक्ष पाल्जोर तामाङले डिभिजन बन कार्यालयको वार्षिक कार्यक्रममा स्वीकृत योजना भएका कारण सम्झौता नभएरै स्थानीयले काम सम्पन्न गरेको बताए । सम्झौता गरेर काम गर्नको लागि समय धेरै लाग्ने र स्थानियलाई सुविधा चाँडै प्रदान गर्नको लागि पनि पुलको निर्मँण गरिएको हो । उनले पछि हिमपात हुँदा चिसोले काम गर्न नसकिने स्थानीयले निष्कर्ष निकाल्दै सबैको सहमतिमा सो योजनाको निर्माण सम्पन्न भएको जनाए । तिल गाउँसम्म गाडी पुर्याउनकै लागि पछि आउन सक्ने जोखिमलाई समेत वास्ता नगरी पुुल निर्माण सम्पन्न गरिएको छ ।
कार्यालयसँग समन्वय गर्ने काम र स्थानीयलाई निर्माण अगाडि बढाउन वडाले भूमिका निर्वाह गरेको हो। यसका लागि उपभोक्ताले कार्यालयसँग समन्वय गरेका थिए । अब उपभोक्ता समिति चैत वैशाखपछि मात्र जिल्लामा आएर सम्झौता गर्ने र अनि मात्र भुक्तानी लिन पाउनेछन्। यो अवधिसम्म काठ ढुवानी र कामदारको ज्याला भने उधारोमै रहनेछ। जसमा सय जना कामदारले बाह्र दिन लगाएर काम गरेका छन् । त्यसमा दक्ष कामदार ३५ जना महिला कामदार पनि छन् ।
पुल निर्माणका लागि प्रयोग गरिएको मेसिनको ज्याला र ग्याबिनको रकमसमेत उधारोमै छ । आउजाउ सहज नभएका कारण लिमीवासी बर्सेनि विकासे योजना सहमतिमा उधारोमा काम गर्ने चलन रहँदै आएको छ । एउटा योजनाको सम्झौताका लागि आउजाउ र कार्यालयसँग काम गर्नुपर्दा दश दिनसम्म लाग्ने गर्छ । यसले गर्दा समय बढी लाग्ने, आर्थिक व्ययभार पनि बढी नै हुने गरेको छ । कार्यालयले सो काठेपुुल निर्माणका लागि साठी लाख बजेट विनियोजन भएको जनाएको छ । अन्यत्र कतै पनि बजेट खातामा नआउँदासम्म यस्ता विकासे योजनाको काम अगाडि बढ्न नसक्ने भए पनि लिमीका स्थानीय भने केही फरक देखिँदै आएका छन् ।
